1 Corinthians 8

Nia meegai tigidaumaha gi nia balu god

1Deenei la go di hai o nia meegai ala ne tigidaumaha ang gi nia balu god. E donu, bolo gidaadou huogodoo gu maalama ang gi di hai deenei, gei di maalama deenei dela ga hidi ai di hagamuamua i baahi nia daangada, gei go di aloho la hua dela e mee di hagahumalia gidaadou. 2Tangada dela bolo ia gu iloo nia mee, ia digi iloo nia mee ala belee hai gi iloo ia. 3Gei tangada dela e aloho i God, deelaa tangada a God e iloo ai.

 4Malaa, di gai o nia meegai ala e tigidaumaha ang gi nia balu god, gidaadou gu iloo bolo di balu god la di mee hagalee donu, gei gidaadou gu iloo bolo ma di God hua e-dahi. 5Maeaha maa nia god e logo i di langi mo henuailala e haga ingoo bolo nia “god” mono dagi, 6gei tadau God la di God hua e-dahi, go Tamana ne hai nia mee huogodoo, gei dela hogi e mouli ginai gidaadou. Gei Tagi hua e dahi, go Jesus Christ. Nia mee huogodoo ne hai mai i mee, gei dela hogi gidaadou e mouli.

 7Nia daangada huogodoo la hagalee e iloo di tonu deenei. Hunu gau gu wouwou nia balu god mai loo i mua, ga dae mai loo gi dangi nei. I di nadau gai nia meegai beenei, digaula e hai nia maa be nia mee hua ni di balu god, gei e hai bolo ginaadou gu milimilia i di gili nia meegai beenei i nadau hagadonu le e paagege. 8Gei gidaadou la hagalee bolo e humalia i baahi o God i di gili nia meegai. Gidaadou hagalee huaidu ma ga hagalee gai nia meegai, be gidaadou hagalee humalia ma ga gai nia meegai.

 9Pula i godou hangaahai, hudee haga bagege ina di hagadonu digau ala e paagege nadau hagadonu ga too gi lodo di huaidu. 10Maa tangada dela e bagege dono hagadonu i nia mee aanei, ga mmada adu gi goodou ala gu maalama e miamiami i lodo di hale daumaha balu god, malaa, dono gidee di mee deenei, la hagalee ga hai a mee gi hiihai di miami i nia meegai tigidaumaha ang gi nia balu god! 11Malaa, di godou duaahina deenei dela e bagege dono hagadonu, dela ne made ginai a Christ, la ga doo gi daha mo goodou, ne hidi mai i godou maalama. 12Di hai deenei, goodou gu hai di huaidu ang gi Christ i di godou hai di huaidu ang gi godou duaahina, mo di haga huaidu nia manawa o digau paagege nadau hagadonu. 13Maa go agu meegai ga hidi dogu duaahina ga doo gi lodo di huaidu, malaa, au ga hagalee gai nia goneiga labelaa, gi dee doo dogu duaahina gi lodo di huaidu.
Copyright information for KPG